Հեշտոցաբորբ (Vaginitis)

Հեշտոցաբորբը հեշտոցի լորձաթաղանթի բորբոքումն է: Առաջանում է տարբեր տարիքի կանանց մոտ և ունի տարբեր պատճառներ: Նախատրամադրող գործոններն են` ընդհանուր քրոնիկական հիվանդությունները, սեռական և անձնական կյանքի հիգիենայի կանոններին չհետևելը, նաև` հորմոնալ խանգարումները:

 

Պատճառներն են` սեռական բորբոքային հիվանդությունները, հեշտոցի վնասվածքները, իջեցումները, մեծ քանակությամբ անտիբիոտիկների օգտագործումը, pH-ի փոփոխությունը, սեղմող ներքնազգեստները, քիմիական տարբեր նյութերը: Տարեց կանանց մոտ հեշտոցաբորբի պատճառը ձվարանների ֆունկցիայի խանգարումներն են, որոնք առաջացնում են հեշտոցի լորձաթաղանթի բարակում և կոչվում են ատրոֆիկ հեշտոցաբորբեր: Շաքարային դիաբետը նույնպես համարվում է սնկային հեշտոցաբորբի նպաստավոր գործոն:

 

Հարուցիչներն են.

 

  • սնկեր,
  • բակտերիաներ (գարդնարելա),
  • ստաֆիլոկոկեր,
  • աղիքային ցուպիկ,
  • միկոպլազմա,
  • գոնոկոկեր,
  • խլամիդիա,
  • տրիխոմոնասներ:

Հիվանդության ախտանշաններն են.

 

  • հեշտոցից թարախային արտադրություն,
  • որովայնի ստորին հատվածի ծանրության զգացողություն,
  • քոր և այրոց,
  • հեշտոցային վատ հոտ,
  • ցավոտ սեռական հարաբերություն:

 

Ախտորոշման համար հարկավոր է կատարել հեշտոցային քսուքի միկրոսկոպիկ քննություն` պարզելու հարուցչի տեսակը: Ըստ միջազգային դասկարգման, հեշտոցաբորբը լինում է սնկային, ատրոֆիկ, բակտերիալ և տրիխոմոնատային: Հետևաբար, բուժումն իրականացվում է ըստ պատճառի և հարուցչի` հակաբիոտիկներ, հակասնկային դեղեր և այլն: Խորհուրդ չի տրվում ինքնախտորոշմամբ և ինքնաբուժմամբ զբաղվել:

 

Կանխարգելման համար պետք է հետևել անձնական և սեռական հիգիենայի կանոններին, կղարձակումից հետո մաքրել առջևից` հետ, ցնցուղ ընդունելիս ցնցուղով հեշտոցը չլվանալ, չորացնել հեշտոցը, անտիբիոտիկների հետ օգտագործել պրոբիոտիկներ, վիտամիններ, հետևել սննդակարգին, խուսափել սթրեսներից: