Միզակապություն. պատճառները և բուժումը
Միզակապությունը ախտաբանական վիճակ է, որի դեպքում միզարձակումից հետո միզապարկում մնում է ավելի քան 20մլ մեզ: Հիմնական սուբյեկտիվ ախտանիշը միզապարկի ոչ լրիվ դատարկման զգացողությունն է: Որպես կանոն, այս խանգարումն ունի քրոնիկական ձև, զարգանում է աստիճանաբար և բնութագրվում է վատթարացման հստակ հակումով՝ մնացորդային մեզի քանակը մշտապես ավելանում է: Որոշ ժամանակ հետո կարող է լիովին միզակապություն առաջանալ, երբ միզարձակումը ամբողջովին ընդհատվում է:
Միզակապությունն ունի իր պատճառները.
- կենտրոնական նյարդային համակարգի հիվանդություններ, գլխուղեղի և ողնուղեղի վնասվածքներ և ուռուցքներ,
- տղամարդկանց մոտ` շագանակագեղձի քաղցկեղ, սկլերոզ, գերաճ, բորբոքում,
- միզասեռական համակարգի վնասվածքներ,
- միզատար խողովակի լուսանցքի նեղացում (ստրիկտուրաներ), միզատար խողովակի ուռուցքներ և արատներ,
- քարեր միզապարկում,
- փոքր կոնքի օրգանների վիրահատություններ, տրավմատիկ ծննդաբերություններ, աբորտներ և այլն:
Քրոնիկական միզակապության ֆոնին կարող է սուր միզակապություն զարգանալ: Այն հանկարծակի է առաջանում: Այս դեպքում հիվանդն ընդհանրապես չի կարողանում միզել, ի հայտ են գալիս այնպիսի ախտանիշներ, ինչպիսիք են` ցավը որովայնի ստորին հատվածում, ընդհանուր թուլությունը, երբեմն մարմնի ջերմության բարձրացումը, սրտխառնոցը, փսխումը:
Միզակապությունը հետևանք է.
- վնասվածքների,
- նյարդային համակարգի հիվանդությունների և վնասվածքների,
- միզուկում քարերի և օտար մարմինների առկայության,
- սթրեսների,
- ալկոհոլային արբեցման,
- փոքր կոնքի օրգանների և շեքի վիրահատությունների,
- դեղորայքային թունավորման,
- երկարատև պառկած վիճակում մնալու:
Փաստ: Օրական արտազատվող մեզի քանակը տատանվում է 1-2 լ, որը համապատասխանում է ընդունած հեղուկի քանակի 60-75%-ին: Օրգանիզմից նյութափոխանակության արգասիքները դուրս բերելու համար մեզի քանակը պետք է լինի առնվազն 500 մլ: Այդ պատճառով մարդուն անհրաժեշտ է օրական ընդունել նվազագույնը 800 մլ հեղուկ:
Վաղ շրջանում հայտնաբերված միզակապության պատճառները ենթակա են բուժման: Այդ պատճառով հիվանդների առաջնային խնդիրն է չդիմանալ և ժամանակին դիմել բժշկի:
Ախտորոշումն սկսվում է հիվանդի զննումից, նրա անամնեզի և գանգատների մանրամասն ուսումնասիրումից: Լրացուցիչ կարող են նշանակվել արյան և մեզի ընդհանուր քննություններ, ուլտրաձայնային հետազոտություն: Կարևորը` խանգարման պատճառը հայտնաբերելն է: Հենց այդ պատճառի վերացումը միզակապության բուժումն է, որը կարող է լինել վիրահատական կամ դեղորայքային՝ պայմանավորված հիմնական խնդրով: