Երբևէ մտածե՞լ եք, թե ի՞նչն է մարդուն գրավիչ դարձնում, նույնիսկ եթե արտաքինից առանձնապես չի փայլում։ Մարդու մոտ կա մի հատկություն, որը հաճախ անտեսվում է, դա էմոցիոնալ հասունությունն է։ Այն չի երևում` ինչպես ֆիզիկական գեղեցկությունը կամ անփոխարինելի չէ` ինչպես հմայքը, սակայն խորապես գրավիչ որակ է և երկարատև կապերի և առողջ հարաբերությունների հիմք։ Էմոցիոնալ հասունությունը իրականում կարևոր է մարդու վստահության, գրավչության և հարաբերությունների համար։

Ի՞նչ է էմոցիոնալ հասունությունը

Էմոցիոնալ հասունությունը վերաբերում է մարդու ունակությանը՝ կառավարել իր հույզերը, գիտակցաբար արձագանքել մյուսներին և պատասխանատվություն կրել իր գործողությունների համար։ Էմոցիոնալ հասունության մաս են կազմում՝ կարեկցանքը, հույզերի կառավարումն ու ինքնատիրապետումը։

Էմոցիոնալ հասուն մարդիկ զերծ չեն հուզական ցավից կամ կոնֆլիկտներից, սակայն նրանք կարողանում են դիմակայել դրանց` տոկունությամբ և գիտակցությամբ։
Բազմաթիվ առումներով, սա հոգեբանական բարեկեցության և առողջ մարդկային փոխհարաբերությունների հիմքն է։ Այն կարևոր է բոլոր հարաբերությունների համար՝ սիրային, ընկերական, ընտանեկան և գործնական։


Ինչո՞ւ է էմոցիոնալ հասունությունը գրավիչ

Էմոցիոնալ հասուն մարդիկ ինքնավստահ են, հարգանքով են վերաբերվում ուրիշներին և չեն թողնում, որ հույզերը ղեկավարեն իրենց։ Այս հատկությունը գրավիչ է, քանի որ՝

• Այն ստեղծում է հուզական անվտանգություն։ Էմոցիոնալ հասուն մարդիկ կանխատեսելի են, չեն պայթում վեճերի ժամանակ, չեն անհետանում սթրեսի պահին, չեն մանիպուլացնում` իրենց ուզածը ստանալու համար։ Այս ամենը խորացնում է վստահությունն ու հոգեբանական անվտանգությունը։
• Այն խոսում է մարդու գիտակցության մասին։ Երբ ինչ-որ մեկն ընդունում է իր սխալները, և կարողանում է վերանայել իր վարքը, դա վկայում է բարձր էմոցիոնալ ինտելեկտի մասին։
• Այն խորացնում է մտերմությունը։ Հասուն մարդիկ ունակ են անկեղծ զրույցների, սահմաններ դնելու և, նույնիսկ, խոցելի լինելու։ Սրանք են այն հմտությունները, որոնք զարգացնում են հարաբերությունները։
• Այն հաղորդում է ուժ և կայունություն։ Ներկա անհանգիստ աշխարհում էմոցիոնալ հասունությունը դառնում է հազվադեպ ու արժեքավոր ուժ։ Դա ցույց է տալիս, որ մարդը կարող է դիմակայել կյանքի դժվարություններին` առանց կործանվելու կամ իր ցավը ուրիշների վրա բարդելու։
  
  
  

Ինչո՞ւ է էմոցիոնալ տհասությունը ոչ գրավիչ

Էմոցիոնալ տհասությունը կամ անգրագիտությունը կարող է վկայել ռիսկային հարաբերությունների մասին` ստեղծելով քաոս, հիասթափություն և տխրություն։ Արդյունքում, վստահությունն ու մտերմությունը խարխլվում են։ Էմոցիոնալ տհասությունը կարող է դրսևորվել որպես`

• վատ հաղորդակցություն (հույզերը չարտահայտել, փակվել, լռել կոնֆլիկտիների ժամանակ),
• անկառավարելի պոռթկումներ,
• կախվածություն նյութերից (ալկոհոլ, սնունդ, թմրանյութեր)` սթրեսը կառավարելու համար,
• ուշադրության ձգտող վարք, որը թաքցնում է անկարողությունը:
  
  

Ինչպե՞ս զարգացնել էմոցիոնալ հասունությունը

Ահա մի քանի եղանակ՝ այն զարգացնելու համար․

• Վերլուծի՛ր ինքդ քեզ։ Հարցրու ինքդ քեզ՝ ի՞նչ եմ զգում, ինչու՞ եմ զգում, ինչպես՞ եմ արձագանքում։ Սա առաջին քայլն է ինքնագիտակցության ճանապարհին։
• Ընդունի՛ր քո բաժինը։ Հասուն մարդիկ պատասխանատվություն են վերցնում իրենց արարքների համար` նույնիսկ եթե այն շատ դժվար է։
• Զարգացրո՛ւ հույզերի կարգավորումը։ Սովորիր կառավարել հույզերը` հատկապես սթրեսի ժամանակ։ Օգտակար մեթոդներից են՝ մեդիտացիան, խորը շնչառությունը, և այլն։
• Կարեկցի՛ր։ Փորձիր իրավիճակները տեսնել դիմացինի աչքերով։
• Սահմաններ դիր ու հարգի՛ր։ Գիտակցել սեփական ու մյուսների սահմաններն՝ էմոցիոնալ հասունության առանցքային բաղադրիչն է։
• Լսի՛ր դիմացինի կարծիքը։ Բաց եղիր կարծիքների համար՝ դրանք աճի գործիք են, ոչ` սպառնալիք։
• Դիմի՛ր հոգեբանի օգնությանը։ Ինքնաճանաչումը թուլություն չէ, այլ` գրավչություն։
  
  

Եզրակացնելով` էմոցիոնալ ինտելեկտը կամ հասունությունը նշանակում է՝ լինել կայուն, հավասարակշիռ, ինքնատիրապետող, խորաթափանց, կարեկցող, հասանելի, մեղմ, միաժամանակ` ուժեղ։ Այս բոլորը միասին ստեղծում են մարդու անզուգական գրավչությունը: