Մաշկի խնամքը հաճախ ասոցացվում է կանանց հետ, բայց իրականում, անկախ սեռից, առողջ մաշկի գաղափարը հավասարապես վերաբերում է երկու սեռերին։ Դա է պատճառը, որ վերջին տարիներին աճում է մաշկի խնամքի կարևորությունը և՛ կանանց, և՛ տղամարդկանց շրջանում:

Մաշկի խնամքը կարևոր է ոչ միայն շրջակա միջավայրի վնասակար նյութերից պաշտպանվելու, ինքնավստահությունը խթանելու, այլև ընդհանուր առողջության պահպանման համար:

Ինչո՞ւ է մաշկի խնամքը կարևոր տղամարդկանց և կանանց համար

1. Շրջակա միջավայրի վնասակար ազդեցությունից՝ պաշտպանություն

• Մաշկն օրգանիզմի պաշտպանության առաջին գիծն է շրջակա միջավայրի վնասակար նյութերից և ճառագայթներից: Իսկ մաշկի խնամքի պատշաճ ռեժիմը ամրապնդում է մաշկի պատնեշի գործառույթը՝ նվազագույնի հասցնելով արտաքին գործոնների վնասակար ռիսկը:
• Ուլտրամանուշակագույն ճառագայթների ազդեցությունը կարող է նպաստել վաղաժամ ծերացմանը, հիպերպիգմենտացիային և, նույնիսկ, մաշկի քաղցկեղի առաջացմանը: Հետևաբար, արևապաշտպան քսուքի կանոնավոր օգտագործումն օգնում է մաշկը պաշտպանել վերոնշյալ վնասակար ազդեցություններից՝ նվազեցնելով արևի վնասման ռիսկը և պահպանելով երիտասարդ տեսքը:

2.  Մաշկի վնասման կանխարգելում

• Մաշկի խնամքը կարևոր է մաշկային հիվանդությունների կանխարգելման համար (ակնե, էկզեմա, ռոզացեա և այլն): Խնամքի միջոցով մաշկն ազատվում է ճարպից ու մանրէներից, որոնք խցանում են մաշկի ծակոտիները և նպաստում ճաքերի առաջացմանը:
• Մաշկի խոնավացումը կարևոր է մաշկի չորության կանխարգելման, նաև թեփոտությունից և գրգռվածությունից ազատվելու համար: Հիալուրոնաթթվի և կերամիդների նման բաղադրիչներով նյութերի օգտագործումը նպաստում է մաշկի փափկությանն ու առաձգականությանը:

3.  Առողջ ծերացում

• Տարիքի հետ նվազում է մաշկի կողմից արտադրվող կոլագենի և էլաստինի քանակը: Հետևաբար, մաշկի մշտական խնամքը նպաստում է ծերացման գործընթացի դանդաղեցմանը՝ նվազեցնելով կնճիռների, բծերի և մաշկի թուլացումը:
• Ամուր ու երիտասարդ մաշկ ունենալուն նպասում են հակաօքսիդանտները, վիտամին C-ն և ռետինոիդները, որոնք  չեզոքացնում են ազատ ռադիկալները և խթանում կոլագենի սինթեզը։

4.  Վստահության և բարեկեցության բարձրացում
 

• Առողջ մաշկը զգալի ազդեցություն ունի մարդու ինքնագնահատականի և ինքնավստահության վրա:
• Մաշկի խնամքի միջոցառումերն ունեն հանգստացող, հակասթրեսային և թուլացնող ազդեցություն, ընդհանուր առմամբ, նաև բարերար ազդեցություն մարդու բարեկեցության վրա։
  
  

Դեմքի մաշկի խնամքի տեսակները տղամարդկանց և կանանց համար

• Մաքրում։ Մաշկի մաքրումը կարող է լինել մակերեսային և խորը։ Մակերեսային մաքրումն անհրաժեշտ է իրականացնել ամեն օր։  Մաքրող միջոցի ընտրությունը կախված է անհատական նախասիրություններից և մաշկի առանձնահատկություններից։
• Տոնուսի բարձրացում։ Մաշկի խնամքի այս փուլն անհրաժեշտ է մաշկի թթվահիմնային բալանսը չեզոքացնելու կամ հավասարակշռելու, մաշկի արտաքին շերտը ևս մեկ անգամ մանրէազերծելու և հակաօքսիդանտներով սնուցելու համար։ Տոնուսավորումը «հող է նախապատրաստում» խոնավացնող քսուքի համար։
• Խոնավացում և սնուցում։ Մաշկի խնամքն անհնարին է առանց խոնավացման։ Խոնավացումն իրականացվում է ամենատարբեր միջոցներով։ Մաշկի սնուցումն իրականացվում է տարբեր քսուքների և դիմակների միջոցով, որոնք պայքարում են մաշկի վաղաժամ ծերացման ու կնճիռների առաջացման դեմ։
• Պաշտպանում։ Շրջակա միջավայրն իր վնասակար ազդեցությունն է գործում մաշկի վրա՝ դարձնելով այն խամրած և ոչ առողջ։ Հետևաբար, հատկապես ամռանը, ակտուալ է արևապաշտպան ֆիլտրով քսուքների օգտագործումը։

Եզրակացնելով՝

Մաշկի խնամքը գենդերային խնդիր չէ, այլ ընդհանուր առողջության և բարեկեցության էական միջոց թե՛ տղամարդկանց, թե՛ կանանց համար: Առաջնահերթություն տալով մաշկի խնամքին և իրականացնելով անհատական մոտեցում, որը համապատասխանում է մարդու կարիքներին ու նախասիրություններին, կարող եք պահպանել կամ ունենալ՝ առողջ, փայլուն և երիտասարդ մաշկ: