Քունը կարգավորող սննդամթերքը բազմաթիվ է, որից կարելի է առանձնացնել ներքոնշյալները:

Տրիպտոֆանով հարուստ սպիտակուցներ։ Տրիպտոֆանը կարևոր ամինաթթու է, որը նպաստում է սերոտոնինի և մելատոնինի առաջացմանը։ Այս նյութով հարուստ են հնդկահավը, հավը, ձուկը, ձուն, դդումի սերմերը, լոբին, գետնանուշը, պանիրը և կանաչեղենը: Այս սպիտակուցները պարզ ածխաջրերի հետ օգտագործելիս կարող են նպաստել տրիպտոֆանի կլանմանն` ուղեղում և քնի որակի բարելավմանը:

Թթու բալի հյութ։ Թթու բալը պարունակում է մեծ քանակությամբ մելատոնին, և ուսումնասիրությունները ցույց են տվել, որ բալի հյութի օգտագործումը կարող է երկարացնել քնի տևողությունը:

Բազուկի հյութ։ Բազուկի հյութը հարուստ է նիտրատներով, որոնք նույնպես նպաստում են որակյալ քնին:

Միկրոտարրեր։ Վիտամին B12-ը, նիացինը, մագնեզիումը և ցինկը կարևոր դեր են խաղում քնի կարգավորման հարցում: Օրինակ, նիացինը կարող է ավելացնել արագ քնի (REM sleep) տևողությունը, իսկ մագնեզիումը նպաստում է մելատոնինի արտադրությանը և ավելացնում քունը խթանող GABA նյարդահաղորդչին:

Կիվի։ Կիվին պարունակում է վիտամին C, վիտամին E, ֆոլաթթու և սերոտոնին, որոնք կարող են բարելավել քնի որակը:

Վերոնշյալ մթերքի հաճախակի օգտագործումը կարող է բարելավել մարդու քնի որակը: Խորհուրդ է տրվում նրանց ներառել սննդակարգում։