Կանանց սեռական հաճույքը հաճախ ներկայացվել է որպես երկրորդական, ոչ պարտադիր կամ «չափազանց հոգեբանական» երևույթ։ Հանրային զրույցներում, բժշկական քննարկումներում և զույգերի հարաբերություններում հաճախ կարելի է հանդիպել այն կարծիքին, որ կնոջ հաճույքը ավելի շատ հոգեբանական է, քան ֆիզիոլոգիական։ Սակայն ժամանակակից անատոմիան և նյարդաֆիզիոլոգիան ծլիկի և նրա սեռականության դերի մասին տալիս են միանգամայն այլ պատկերացումներ ։

Ծլիկը էրեկտիլ օրգա՞ն

Կլիտորիսը հաճախ ընկալվում է որպես արտաքին և քիչ տեսանելի, մինչդեռ իրականում ներքին կառուցվաք ունեցող ու բարդ օրգան է։ Այս օրգանի մեծ մասը չի երեվում, կազմված է անոթային հարուստ հյուսվածքներից, որոնք կառուցվածքով և գործառույթով համեմատելի են տղամարդու էրեկտիլ հյուսվածքի հետ։

Այսպես, գրգռման ընթացքում ծլիկում տեղի են ունենում այն հիմնական գործընթացները, ինչը տեղի է ունենում տղամարդու առնանդամի էրեկտիլ հյուսվածքում՝ արյան հոսքի ավելացում, հյուսվածքների ուռճեցում, զգայունության բարձրացում, նյարդային ազդակների ակտիվացում ևայլն։ Տղամարդու դեպքում այս փոփոխությունները արտաքինից ակնհայտ են, իսկ կնոջ դեպքում հիմնականում՝ աննկատ։ Այս փաստը խոսում է այն մասին, որ խոսքը ոչ թե կնոջ «զգացողության» կամ «հոգեվիճակի» մասին է միայն, այլև իրական անատոմիական և ֆիզիոլոգիական գործընթացների։

Ինչո՞ւ է կնոջ հաճույքը ներկայացվում որպես երկրորդական

Կանանց սեռական հաճույքի անտեսումը մեծ մասամբ պայմանավորված է ոչ թե կենսաբանական գործոններով, այլ մշակութային և սոցիալական պատկերացումներով։ Պատմականորեն կանանց սեռական օրգանները հաճախ դիտարկվել են վերարտադրողական ֆունկցիայի տեսանկյունից, իսկ հաճույքը՝ որպես ոչ պարտադիր կամ նույնիսկ «ավելորդ»։ Սակայն եթե օրգանիզմը ձևավորել է ծլիկի անոթային և նյարդային հարուստ համակարգ, հետևաբար բնության մեջ նման համակարգի գոյությունը կարելի է բացատրել միայն դրա կենսաբանական նշանակությամբ։

Հաճույքը՝ որպես առողջության բաղադրիչ

Սեռական հաճույքը կապված է նյարդային համակարգի, հորմոնալ հավասարակշռության, սթրեսի կարգավորման և մտերմության զգացողության հետ։ Այն կարող է դիտարկվել որպես ընդհանուր առողջության ցուցիչ՝ ինչպես քունը, էներգիան կամ ախորժակը։

Երբ կնոջ մոտ սեռական գրգռումը կամ հաճույքը երկար ժամանակ բացակայում է, դա միշտ չէ, որ «հոգեբանական» արգելափակման խնդիր է։ Շատ դեպքերում այդ վիճակը կարող է պայմանավորված լինել՝ հորմոնալ, անոթային, նյարդաբանական կամ դեղորայքային գործոններով։

Կանանց սեռական հաճույքի մասին խոսելիս անհրաժեշտ է փոխել ընդունված ձևակերպումները և այն դիտարկել որպես բնական ֆիզիոլոգիական ֆունկցիա։ Այս վերաբերմունքը օգնում է զույգերին բարելավել իրենց կյանքի և փոխհարաբերությունների որակը։ Մարմինը վաղուց տվել է այս հարցի պատասխանը։
Մնացածը կախված է նրան լսելու մեր պատրաստակամությունից։