Երիկամի կիստան երիկամային հյուսվածքում կլորավուն խոռոչավոր գոյացություն է։ Այս գոյացությունը շրջապատված է շարակցահյուսվածքային պատիճով և լցված է հեղուկով։ Կարող են ձևավորվել միայնակ կամ բազմաթիվ դեֆեկտներ։  

Տարբերում են.

• բնածին, որն առաջանում է զարգացման արատների արդյունքում կամ գենետիկ նախատրամադրվածության ֆոնին, 
• ձեռք բերովի՝ գլոմերուլոնեֆրիտի, պիելոնեֆրիտի, երիկամի ուռուցքների դեպքում։

Խոռոչի հեղուկն ըստ բնույթի կարող է լինել.

• շճային՝ թափանցիկ, դեղնավուն երանգով,
• հեմոռագիկ՝ պարունակության մեջ արյան առկայություն,
• թարախային՝ խոռոչում թարախի առաջացում։

Երիկամի կիստաների առաջացման ռիսկի գործոնները

• Միզասեռական համակարգի վարակիչ և բորբոքային հիվանդություններ,
• երիկամների վիրահատություններ և վնասվածքներ,
• զարկերակային ճնշման քրոնիկ բարձրացում,
• ժառանգական նախատրամադրվածություն,
• ուռուցքային հիվանդություններ,
• տուբերկուլոզ,
• երիկամներում քարերի առաջացում։

Ախտանիշները

Կիստայի չափերով պայմանավորված՝ ձևավորվում է հիվանդության կլինիկական պատկերը։ Հաճախ, սկզբնական փուլերում, ախտանիշները բացակայում են։  Ախտաբանության նշաններն սկսում են դրսևորվել` խոռոչի չափերի մեծացմանը զուգընթաց։

Բնորոշ է.

• ծանրաբեռնվածության ժամանակ ուժգնացող ցավ` գոտկային շրջանում,
• ցավ` միզապարկի և միզածորանի շրջանում,
• դիաստոլիկ (ստորին) ճնշման բարձրացում,
• միզարձակման դժվարացում,
• մեզում` արյան առկայություն,
• երիկամի ծավալի մեծացում։

Անհրաժեշտ բուժում չիրականացնելու դեպքում հետագայում հնարավոր է երկրորդային վարակի միացում, քրոնիկ երիկամային անբավարարություն, կիստայի պատռվածք և անցում` բարորակից չարորակ ձևի։  

Ախտորոշում

• ուլտրաձայնային հետազոտություն,
• երիկամների համակարգչային և մագնիսառեզոնանսային շերտագրություն,
• անգիոգրաֆիա, սցինտիգրաֆիա, ուրոգրաֆիա,
• արյան և մեզի ընդհանուր կլինիկական հետազոտություններ։